自己一人出走挑戰日本神山之旅
日本富士山: 2018-09-05 至 2018-09-12 (8日)
我今次出走嘅感想
今次嘅出走真係好有挑戰性, 主要係行四座日本神山, 其實我係香港亦唔多行山, 多數係露營為主, 點解會突然想去日本行山? 開頭係因為想喺九月十一日前行富士山, 跟住諗吓附近仲有乜嘢山可以行, 跟住就選擇咗唔太遠嘅日本南阿爾卑斯山脈其中嘅白峰三山(北岳山, 間ノ岳, 同埋農鳥岳), 最大挑戰係行白峰三山係需要至少三日兩夜, 我自己就用咗四日三夜
有幾樣嘢我自己要特別留意
1) 首先我嘅體能可唔可以六日都行出哩(兩日富士山, 四日白峰三山)? 咁我估自己一路做咁多運動, 應該應付得到嘅
2) 跟住係要應付高山反應, 不過因為之前我去西藏時冇事, 就當自己ok啦, 哈哈, 同埋我喺出發前個幾兩個禮拜, 忍痛停咗做所有帶氧運動, 到最尾嗰個禮拜連重訓都停埋
3) 跟住就係安全問題, 一個人行, 會唔會有危險哩? 我自己做咗啲research關於山上有事會點, 買嘅保險包唔包我行山嘅高度, 咁經過今次, 我覺得最危險係喺高山上嘅天氣, 大雨還好啲, 大風真係自己控制唔到自己, 咁喺山最大風嘅位, 我都會將身體"座"低啲, 同埋行山竹係超有幫助, 咁另外就係行山脊或一啲山頂位時, 企嘅位都好細, 唔小心一跌就幾百米, 都唔係重點, 重點係有事都冇人知, 因為由北岳山開始打後, 都好少人行, 咁有乜事都真係叫天不應叫地不聞, 同埋自己都帶定啲急救包
4) 就係食啦, 雖然山上嘅小屋子其實都有嘢食有嘢飲, 當然啲費用係比起山腳高好多啦, 咁我自己又想自己煮, 所以買嘢食時都會買啲好必需嘅食物, 同埋行動糧係好需要, 揀啲高卡啲, 我都買咗啲朱古力bar, 因為我發覺我食朱古力bar開心好多, 哈哈
5) 跟住係瞓交啦, 富士山就一定要住屋仔, 其他山就可以露營, 但係第二三晚太大大大風了, 所以都要住返小屋子, 其實上面小屋子一泊兩食價錢都唔算貴, 多數係十萬yen樓下, 如果唔想"咩"咁多嘢的話, 可以考慮住小屋子
6) 至於衫褲, 主要係要防水, 成套gear都要, 因為山上天氣變得太快, 呢頭好好天, 過幾分鐘真係可以變得好大風大雨, 咁當然要用洋蔥式嘅著法啦, 對鞋好重要, 因為會行幾日, 防水同舒適好重要, 加埋對行山袜, 掂晒, 咁大家可以睇吓我嘅Gear review啦
咁行咗六日嘅山, 最勁係有兩日行咗9個鐘同11個鐘, 發覺自己都可以做得到, 中間有休息時間, 但係每次唔好休息太耐, 因為對腳一放涼就好難再pick up返, 其實諗返轉頭, 我能夠做得到, 安全返嚟, 真係好唔簡單, 好好彩我喺之前上咗山藝, 知道好多山上嘅知識, 點睇地圖, 點去應付山上天氣, 所以我好建議如果想去外國行山, 可以至少上山藝一級
以下係我今個trip嘅特別事
留言
Anson: 路過見到正，留言支持
Hidy: 多謝支持啊
1 Like | 我想留言
日本人真好, 呢個日本妹, 見我傻吓傻吓, 就問我想去邊, 仲帶埋我去, 我哋用簡單嘅英文溝通, 感覺好好
0 Like | 我想留言
第一次住膠囊, 居然覺得好好, 因為瞓嘅地方都好夠, 不過如果你係女仔, 咁住lady area就好好多, 超安全囉
0 Like | 我想留言
上年半眼都睇唔到富士山, 今次搭緊巴士時, 左邊一望, 突然見到佢, 嗰一下好有感覺啊
0 Like | 我想留言
之前不停做planning, 終於嚟到五合目, 網上嘅相同親眼望到, 真係兩樣嘢, 空氣都超好
0 Like | 我想留言
用咗大約三個幾鐘, 由五合目登山口去到八合目, 覺得都ok喎, 上到去嘅景真係超正
0 Like | 我想留言
雖然仲差八合半目同山頂, 但我已經好開心能夠完成80%
0 Like | 我想留言
大自然嘅力量真係唔簡單, 我只係瞓咗幾粒鐘, 個天可以由勁好天, 變成大風雨, 連山頂都要封山, 真係有啲失望, 本來想等到好天再攻頂, 但冷血嘅屋主, 要我哋全部住客離開, 因為佢話要留位比跟住上嚟嘅人喎, 其實咁大風雨, 就算有人上嚟都唔多啦, 唉, 勁對呢間屋嘅屋主好失望, 還有幾個香港人, 一齊行返落五合目, 又濕又凍, 嗰一下都幾有感覺
0 Like | 我想留言
嚟到甲府市, 一個預備登山最近嘅市, 雖然唔多特別景點, 但係好日本feel, 我周圍行吓已感覺到日本嘅文化
0 Like | 我想留言
第一次外國行山, 我好早就預備好, 睇定地圖, 咁佢哋亦出咗app, 但我發覺手攞住地圖行, 感覺好好多, 加上因為行幾日, 其實電話隨時冇電, 有人可能會話可以帶太陽能板, 但我話比大家知, 上年我都知, 個天係一陰少少, 其實就已經冇電到, 所以唔好浪費嗰四百幾gram嘅重量吧, 所以有個實物嘅地圖+指南針係好重要, 唔同行香港咁
0 Like | 我想留言
四日三夜, 日本南阿爾卑斯山脈嘅白峰三山
1) 北岳山
2) 間ノ岳
3) 農鳥岳
0 Like | 我想留言
睇吓實物啦, 而家望返都覺得好唔簡單
0 Like | 我想留言
佢哋嘅高度同我住嘅地方, 我覺得最難係由北岳山去大門沢小屋, 因為大風同好嚴峻, 最辛苦係落山, 由三千幾落到八百幾, 仲要不停落雨, 真係大叫救命呀, 又怕傷膝頭, 但又怕入黑前去唔到, 雖然睇地圖+GPS大約都知自己喺邊, 但望極好似都冇乜點郁, 哈哈
0 Like | 我想留言
呢個錯誤… 真係自己問題, 心裡梗本開心同興奮得滯, 冇留意到入口同條橋係咁近, 浪費了起碼個半鐘, 所以千祈唔好先入為主, 因為錯咗一樣嘢, 可能就要加多一日, 好似我咁, 哈哈
0 Like | 我想留言
第一日露, 亦係最後一日, 哈哈, 因為呢度比較小風, 今次真係攞嚟"咩", 辛苦了, 不過我仍然係好享受露營的, 經過今次, 我更加知道我個帳篷係要乜 ^^
0 Like | 我想留言
北岳山, 日本第一神山, 我到咗啦~~~~~~~~, 嗰下真係好開心, 第一次外國攻頂, 風景仲要好靚好舒服, 感覺真係講唔出口呀, 兩眼都放到好大, 希望可以吸晒所以風景, 哈哈
0 Like | 我想留言
中白根山雖然唔係百名山之一, 但係風景一樣超正
0 Like | 我想留言
日本百名山之一, 間ノ岳, 亦都係白峰三山第二座山
0 Like | 我想留言
雖然今次攻唔到富士山山頂, 但能夠喺呢一角度望住佢, 個感覺超好, 下次我會用另一個方法攻你個頂呀
0 Like | 我想留言
農鳥岳嘅西農鳥岳, 天氣突變, 好大風, 係勁大風, 攻頂時我直頭唔敢企喺度, 因為一定吹走我, 所以話, 人類係要隨時應付大自然 (Rain cover就係呢個時候吹走咗, 哈哈)
0 Like | 我想留言
大風+嚴峻嘅山, 我半點分心都唔敢, 不停同胡迪講, 頂x住呀
0 Like | 我想留言
農鳥岳, 終於到咗白峰三山最後嘅山
0 Like | 我想留言
落山了, 以為就快完? 嘿, 最辛苦係呢一段, 又落大雨, 啲石又濕又大級, 半點都唔可以踩得唔穏呀, 有幾下我都差啲扭親隻腳, 所以落得好慢, 但心裡又怕趕唔切, 好矛盾呀
0 Like | 我想留言
好有人情味嘅小屋子, 我成套gear都濕晒, 屋主用暖氣幫我整乾晒啲嘢, 好感動呀
0 Like | 我想留言
喺最尾小屋子識到兩個日本人, 佢哋係超好, 好好笑, 一個識英文, 一個識普通話, 不過只要溝通到都已經超開心, 仲約埋第二朝一齊落山
0 Like | 我想留言
四日冇沖涼, 有個比有紋身嘅人入, 太感動啦, 勁舒服呀
0 Like | 我想留言
返到新宿, 即去食燒牛呀, 感覺勁滿足呀
0 Like | 我想留言
去咗日本文化氣息好勁嘅市, 六本木, 周圍行吓睇吓, 我又覺得好好啊
0 Like | 我想留言
行山地圖考唔到我, 但呢啲東京駅嘅地圖, 我真係搞唔掂, 想搵地方食, 中間問咗幾個人, 真係難到我啦
0 Like | 我想留言
終於完成了, 班機delay, 等待中, 你估我諗緊乜? 就係下個trip去邊, 哈哈, 人生就係咁啊
0 Like | 我想留言